ريال مدريد هو الاحلام المستحيل تحقيقها .. هو التاريخ (الاعظم في كرة القدم) ..

اتذكر مرة بعد رحيل اوزيل كتبت تغريدة فكرتها " بحريقة، الريال ما يوقف على اي لاعب" جاني رد من احد محبي اوزيل "كلام غير منطقي. الريال عبارة عن هذه النجوم اللي جالس يفرط فيها! بلا مثالية زائدة"

الريال عبارة عن هذه النجوم؟ كلمة جميلة بصراحة وتخلينا نفكر، ايش لازم يقدم النجم عشان يضيف اسمه لهذه القائمة اللي تشكل اعظم نادي في تاريخ كرة القدم؟

من وجهة نظري اشوف عنصرين مهمة لازم تنضاف:

- نشوف الفريق قبله وبعده

- وعشان لا يُظلم النجم بمن حوله من لاعبين، نحلل اللي يقدمه شخصياً

الفريق قبل رونالدو وبعده مختلف! وانجازات رونالدو الفردية تتكلم عن نفسها! متعة وارقام ما حصلت في تاريخ النادي (كمعدل) ولا حتى في تاريخ الليجا .. دقيقة .. تاريخ الريال اكبر من تاريخ الليجا .. المهم، نرجع لموضوعنا ..

الفريق قبل اوزيل وبعده؟ بدون مبالغة ممكن اقول افضل بعد اوزيل! من اكثر ما كان يستفزني هو انه اوزيل يختفي وقت الحسم! ورونالدو يتنكب من محاصرة مستحيل يخرج منها اي لاعب فيزيائياً! والحمدلله اثبت هذا الشيء رونالدو الموسم الاخير ونصف هذا الموسم!

الفريق قبل دي ماريا وبعده؟ قبل لا نحلل اي شيء، دي ماريا طوال فترته مع الريال لم يكن بالمستوى الاسطوري الا من منتصف الموسم الماضي حتى نهائي لشبونة ليستحق لقب رجل المبارة الاهم اخر ١٠ سنوات! .. ولكن معقولة نصف موسم من هذا المستوى العالي يخليه ينضم للقائمة؟ بالنسبة لي : بدري عليه!

مدربين؟ اعرف هذا الكلام بيزعل كثير .. لكن نفس الكلام ينطبق على مورينهو. احراز لقب دوري واحد وفشله في تحقيق الهدف الاسمى (العاشرة) ما يخليه يستحق ينضم لهذه القائمة وفي نفس الوقت ما نقلل من مورينهو وسجله الاسطوري من تحقيقه للابطال مع بورتو الى ارقام المرعبة مع تشيلسي هذا الموسم (اتوقعه منافس قوي جداً للريال هذا الموسم) ولكن .. مع الريال، مورينهو لا يستحق ان يكون ضمن قائمة من صنعوا تاريخ ومجد الريال.

نرجع بالتاريخ ١٠ سنوات للخلف، لاعب زي زيدان ممكن الارقام ما تساعده (البطولات) ولكن كفاية نعرف انه اسم السياسة المتبعة وقتها في النادي (زيدانيز بافونيز) بمعنى نجيب صفقات جلاكتيكوس مثل زيدان وخياس من الكاستيا مثل بافون وبرافو وميخيا (كنت ادافع عنهم ايام السبورت .. من الاخطاء اللي اندم عليها الى اليوم!) ولكن في نفس الوقت، زيدان بكل إختصار روّض جمهور البرنابيو الاصعب في العالم! الفريق يخسر كل البطولات ومع ذلك ينبهر باللي يقدم الاصلع! كان يعرف انه ماهو ذنب زيدان انه هنري رح يواجه برافو! او توتي بيقابل جوتي (كمحور دفاعي!!) 

خلاصة الكلام: ريال مدريد هو

المستوى العالي جداً المتوقع من اللاعبين ..

هو الاحلام المجددة كل عام (الفوز بكل شيء) ..

هو التاريخ (الاعظم في كرة القدم) ..

هو الـ fucking high standards

اللي حطها لاعبين زي بوشكاش وخينتو ودي ستيفانو وراؤول ورونالدو الظاهرة وكريستيانو وزيدان وروبرتو كارلوس وبوتراجينو وخوانيتو والقائمة تطول .. ولكن قبل لا تحط اسم اي لاعب فقط لانه نجم وحبيته عشان كلاسيكو واحد او اثنين لازم تسأل نفسك سؤال بسيط (قدم شيء من المذكور اعلاه عشان يستحق يكون معاهم؟)

ممكن يكون لاعب محبوب وقدم مستوى جميل ونحترمه مثل الونسو .. لكن يكون لاعب صنع تاريخ ريال مدريد؟ هذه كلمة كبيرة جداً ولازم نكون منطقيين قبل إضافة اي نجم لها ..

وداعاً دي ماريا

وداعاً الونسو

شكراً على كل ما قدمتوه .. وفي نفس الوقت .. هاردلك على نزولكم درجة في كرة القدم .. مانشيستر يونايتد وبايرن ميونخ اندية كبيرة جداً .. لكنها ليست ريال مدريد.

هالا ماااادريد!

احمد .. يشجع فريق عنده عشرة ابطال .. انت فريقك عنده كم؟